Asturies ye la undécima comunidá en cuantes a los sueldos de los sos trabayadores, según un estudiu
El trabayu espeya qu'un home con un ciclu de FP tien un salariu superior al d'un universitariu
N'Asturies una muyer con estudios superiores gana lo mesmo qu'un home con estudios de primaria
MADRID/UVIÉU, 13 de Setiembre (EUROPA PRESS)
Asturies ocupa'l puestu númberu once de les comunidaes autónomes colos sueldos más altos. Navarra encabeza un ranking de les comunidaes autónomes colos sueldos más altos, según un análisis ellaboráu por Randstad de magar d'una base de 500.000 contratos de trabayu fechos demientres los dos últimos años, informaron fontes de Randstad al traviés de una nota de prensa.
Por cada euru que gana un trabayador en Navarra, un asturianu gana 0,88 euros, mientres qu'un madrilanu ingresa 0,89 y un emplegáu n'Estremadura, la comunidá menos favorecida, algama 0,81 euros.
Dempués de Navarra, les comunidaes que perciben un mayor salariu son: País Vascu, Cataluña, La Rioxa, Castiella y Llión, Baleares, Canaries, Galicia, Marid, Aragón y Asturies.
Nel planu contrariu, les comunidaes autónomes nes que menos se gana n'orden descendente son: Andalucía, Murcia, Valencia, Castiella La Mancha, Cantabria y Estremadura.
Según l'análisis, les muyeres cobren de media un tres por cientu menos que los homes y malpenes hai diferencies significatives ente españoles y estranxeros. Amás, un mayor nivel d'educación permite un meyor sueldu, siendo los inxenieros superiores, doctoraos, llicenciaos y diplomaos los meyor pagaos.
N'Asturies el salariu que perciben los homes ye llixeramente mayor que'l que reciben les muyeres, menos nel casu de los titulaos universitarios, ya que les muyeres superen a éstos nun 0,01 por cientu. Llama l'atención, según l'estudiu, qu'un home con un ciclu de FP gana más qu'un universitariu.
Estos datos obuviéronse nuna base de más de 500.000 contratos de trabayu fechos nos últimos años (2005-2006) a 174.000 trabayadores, onde Randstad realizó un análisis de los salarios de los trabayadores nel mercáu llaboral español.
http://www.europapress.es/noticia.aspx?cod=2007091 3184948&ch=395
Bueno, ¿que vos paez? Yo creo qu'esti estudiu nun tien en cuenta delles coses, lo qu'a la fin repercute nes conclusiones que saquen, que dende'l mio puntu vista, un par delles nun son del tou acertaes o polo menos sorprendenme porque nun ye lo que veniemos sintiendo fasta agora.
Lo primeru eso de que estemos nel puestu 11 nel ranking esti... En que quedamos tamos na zona media baxa o tamos na cola pa estes coses. ¿Ta remontando Asturies nesto en concretu de los sueldos? Si nun paren de destruise puestos de trabayu de calidá y consolidaos a cambiu de morralla, ¿como pue ser esto? ¿Será que nos demás sitios ta baxando la calidá del emplegu y non que meyoren equí?
Y otra cosa que me llamó l'atención: eso de que nun hai diferencies significatives nos contratos ente estranxeros y los que tenemos nacionalidá española... ejem. de mano más de la mitá nun apaez en dengún papel, asina que...
polo demás, tamien ye curiosu'l fechu de que los universitarios n'Asturies ganen menos, aunque yo creo qu'esto ya lo tenemos mui vistu. A ver que vos paez a los y les demás.
Salú
